2Ki 9 | ZomZIV | STEP | Kamsangpa Elisha in kamsang honte lak panin khat sama, “Na kawnggak ah na puantual zep inla hih sathau um tawi-in Ramoth Gilead ah pai in.

2 Kings 9

Israel Kumpi-in Jehu Sathau Kinilh

1 Kamsangpa Elisha in kamsang honte lak panin khat sama, “Na kawnggak ah na puantual zep inla hih sathau um tawi-in Ramoth Gilead ah pai in. 2 Tua lai na tun ciangin, Nimshi tapa, Jehoshaphat tapa Jehu zong in. Ama kiangah pai inla, a lawmte kiang panin paikhiat-pihin inn sungtawng khat ah paipih in. 3 Tua lai-ah sathau um la-in a lu tungah sung inla: ‘TOPA gen hih ahi hi: Israel uk dingin sathau kong nilh hi,’ ci in. Tua ciangin kong hong inla tai in; ziakai kei in!” a ci hi. ^a

4 Tua ciangin kamsang khangnopa Ramoth Gilead ah a pai hi. 5 Amah a tun ciangin, galkap uliante a tukhawm uh a mu hi. Amah in, “Makaipa aw, nang tungah kong gen ding khat a om hi,” a ci hi.

Jehu in, “Ko kua pen ka hi uh hiam?” ci-in a dong hi.

“Nangmah, a makaipa,” ci-in a dawng hi.

6 Jehu dinga, inn sungah a pai hi. Tua ciangin kamsangpa in Jehu lutungah sathau sunga, “TOPA, Israel Pasian gen hih ahi hi: ‘TOPA mi Israel kumpi dingin nang sathau kong nilh hi. 7 Nang in na pu Ahab innkuan na susia dinga, keimah in ka nasem kamsangte sisan le Jezebel in a luansak TOPA nasemte khempeuh sisan phu ka la ding hi. 8 Ahab innkuan bup a mangthang ding uh hi. Keimah in Ahab kiang panin Israel pasal khempeuh - sila, sila loin a bei dong ka vatmai khin ding hi. 9 Nebat tapa Jeroboam innkuan le Ahijah tapa Baasha innkuan bangin Ahab innkuan ka bawl ding hi. 10 Jezebel ahileh, Jezreel ah leitual neu khatah uite in valhtum ding uh a, kuamah in a vui kei ding hi,’ ci hi,” a ci hi. Tua ciangin kong hongin a tai hi. ^b

11 A lawm uliante kiangah Jehu a pusuah khiat ciangin amaute khat in, “Thu hoih ahi hiam? Bang hang hih mihaipa na kiangah hong pai ahi hiam?” ci-in a dong hi.

Jehu in, “A mi le a gen nate na thei uh ahi hi,” ci-in a dawng hi.

12 Amaute in, “Tua pen thumaan lo hi. Hong gen in,” a ci uh hi.

Jehu in, “Hong thugen hih ahi hi: ‘TOPA gen hih ahi hi: Israel uk dingin nang sathau kong nilh hi,’ hong ci hi,” a ci hi.

13 Amaute in a puanpite uh suah samsam uh a ama mai kahleite tungah a phah uh hi. Tua ciangin amaute in pengkul mut uh a, “Jehu kumpi hi ta hi!” ci-in a awng uh hi. ^c

Jehu in Joram le Ahaziah That

14 Tua ciangin Nimshi tapa Jehoshaphat tapa Jehu in Joram a sawmsim hi. (Tua laitakin Joram le Israel khempeuh in Ramoth Gilead ah Aram kumpi Hazael langpan uh a, 15 ahi hangin Kumpi Joram ^{▼▼9.15 Hebrew ah Jehoram; Joramtawh kilamdang lo tg.17 le 21-24 ah zong} ahileh Aram kumpi Hazael tawh a kido lai-a Aram-te liamsakna mate damsak dingin Jezreel ah a ciah khin hi.) Jehu in, “Hih bangin hoihsa na hih uh leh Jezreel ah thuthak gen dingin hih khuapi panin kuamah gelkhia sak kei un,” a ci hi. 16 Tua ciangin a sakkolleng tungah kah a, Jezreel lam manawhin a tuang hi, bang hang hiam cih leh tua lai-ah Joram tawlnga a, Judah kumpipa Ahaziah a hawh dingin a paisuk hi.

17 Jezreel tausang tunga galvil-a ompa in Jehu galkap honte in amau lam a manawh uh a muh ciangin, “Galkap hon khat hong pai ka mu hi,” ci-in a awng hi.

Joram in, “Sakol tungtuang khat sam inla amaute dawnsak in, ‘Lemna thu-a hong pai na hi uh hiam?’ cisak in,” ci-in thu a pia hi.

18 Sakol tungtuangpa Jehu dawn dingin paikhia a, “Kumpipa in, ‘Lemna thu-a hong pai na hi uh hiam?’ ci hi,” a ci hi.

Jehu in, “Lemna thu hileh bang cih nuam na hiam? Ka nungah pai in,” ci-in a dawng hi.

Galvilpa in, “Kamtaipa amaute kiang tung napi amah hong kileh kik lo hi,” ci-in a zasak hi.

19 Tua ciangin kumpipa in sakol tuang a nihna a sawl hi. Amaute kiang a tun ciangin, “Kumpipa in, ‘Lemna thu-a hong pai na hi uh hiam?’ ci hi,” a ci hi.

Jehu in, “Lemna thu hileh bang cih nuam na hiam? Ka nungah pai in,” a ci hi.

20 Galvilpa in, “Amah amaute kiang tung napi hong ciah kik tuan lo hi. A sakolleng hawlpa Nimshi tapa Jehu tawh kibanga - amah in mihai bangin a hawl hi,” ci-in a zasak hi. ^e

21 Joram in, “Ka sakolleng vawh un,” ci-in thu a pia hi. A vawh khit uh ciangin Israel kumpipa Joram le Judah kumpipa Ahaziah-te Jehu maituah dingin amau leng tuakin a tuangkhia uh hi. Amaute in Jezreel-te Naboth lopaang ah amah a tuak uh hi. 22 Joram in Jehu a muh ciangin, “Jehu aw, lemna thu-a hong pai na hiam?” ci-in a dong hi. ^f

Jehu in, “Na nu Jezebel a milim biakna le a aisannate khempeuh tawh a kidim laisiah bangci bangin lemna om thei ding hiam?” ci-in a dawng hi. ^g

23 Joram kileh hei-in tai-a: Ahaziah sam kawmin ‘Ahaziah aw, hong kilehdo ei!” ci-in Ahaziah a sam kawm hi. ^h

24 Tua ciangin Jehu in a thal keka Joram liangko kikal a kap hi. Thaltang in a lungtang pailet-a a sakolleng sungah a khuptuk hi. 25 Jehu in a leng ukpipa Bidkar kiangah, “Amah tawm inla Jezreel-te Naboth lo ah paii in. A pa Ahab nungah sakolleng in i tuan lai-in ama thu TOPA genkholhsa: 26 ‘Zanin Naboth le a tapate sisan ka mu hi, TOPA in cikhia a, hih leitangah nang kong thuk taktak ding hi,’ TOPA in a cih phawk in. ^{▼▼9.26 1Ku 21:19 en in.} Tua ahi ciangin tu-in tawmto inla TOPA kammal tawh kizui-in tua leitangah amah paii in,” a ci hi. ^j

27 Judah kumpipa Ahaziah in thupiang a muh ciangin Beth Haggon ^{▼▼9.27 Ahikeh huan inn lampi zui-in taikek uh hi.} lam tawnin a tai to hi. Jehu in delh in awng a, “Amah zong that un!” a ci hi. Amaute in Ibleam kianga Gur paina-ah a sakolleng tungah amah liamsak uh a, ahi hangin Megiddo ah suakta in tua lai-ah a si hi. 28 A nasemte in Jerusalem ah sakollengin pua uh a, David Khuapi ama hanah a pate tawh a vui uh hi. 29 (Ahab tapa Joram a kum sawm le khatna-in Ahaziah Judah kumpi a suak khin hi.) ^l

Jezebel Kithat

30 Tua ciangin Jezreel ah Jehu a pai hi. Jezebel in tua thu a zak ciangin a mitte zutin a sam bawlin tawhlet ah a dakkhia hi. 31 Kongpi ah Jehu a lut laitakin tuanu in, “Na pu Zimri thatpa aw, lemthu-a hong pai na hiam?” ^{▼▼9.31 Ahikeh Zimri a pu thatpa tawh kilem ahi hiam?} ci-in a dong hi.

32 Amah tawhlet lamah dakto a, “Kei lamah kua pang na hi uh hiam? Kua e?” ci-in a awng hi. Cilgehte nih hiam, thum hiam in a ensuk uh hi. 33 Jehu in, ‘Tuanu lawnsuk un!” a ci hi. Tua ciangin amaute in tuanu lawnsuk uh a, a sisan kulhte le sakolte tungah kithehin, amaute in a khe un a tuangawp uh hi.

34 Jehu a sungah tumin ne in a dawn hi. Amah in, “Tuanu kumpipa tanu ahi manin tua a kihamsiat numei donin vui un,” a ci hi. 35 Ahi hangin amaute a vui dingin a kuankhiat uh ciangin a luguh le a khutte le a khete longal bangmah a mu kei uh hi. 36 Amaute pai kik uh a Jehu kiangah gen uh a, amah in, “TOPA in ama nasem Tishbi-te Elijah tungah: Jezreel a leitang tungah Jezebel sa ^{▼▼9.36 1Ku. 21:23 en in} ui in a ne ding hi. 37 Kuamah in, ‘Hih Jezebel hi a cih theih loh dingin Jezreel leitang tungah Jezebel luang ek tawh kibang ding hi,’ ci hi,” a ci uh hi. ^o